Plantun de Prouvènço

Pèr coumpara dos planto d'encò nostre

Thalictrum flavum & Zygodon rupestris

Thalictrum flavum

Ranunculaceae

Noms en français : Pigamon jaune, Pigamon des rives.

Descripcioun :
La rudo-de-prat se rescontro dins li relarg umide, prado e roubino. Es uno planto gaire coumuno au nostre. Èi pulèu grando, sènso péu e poulideto emé sis estamino bèn jauno. Se destrìo de Thalictrum lucidum bonodi si fueio que soun bèn mai larjo (>3mm) emé de tros en lanço (fotò).

Usanço :
Li racino ajudon à caga e à pissa. Li fueio en bouioun soun lachativo. La racino s'utiliso pèr tencha la lano en jauno.

Port : Grando erbo
Taio : 80 à 150 cm
Fueio : coumpausado
Tipe bioulougico : Emicriptoufite
Cicle bioulougico : Planto renadivo

Gènre : Thalictrum
Famiho : Ranunculaceae

Ordre : Ranunculales

Coulour de la flour : Jauno
Petalo : 5
Ø (o loungour) flour : Pancaro entresigna
Flourido : Printèms - Estiéu

Sòu : Ca
Autour basso e auto : 0 à 800 m
Aparado : Noun
Mai à juliet

Liò : Roubino - Prado umido
Estànci : Mesoumediterran
Couroulougi : Éurasiatico
Ref. sc. : Thalictrum flavum L., 1753

Flouquet-dis-aubre

Zygodon rupestris

Orthotrichaceae

Nom en français : Houppe des rochers.

Descripcioun :
Aquelo mousso coumuno acroucarpo d'aperaqui 1 cm d'aut, se vèi bèn sus li pège d'aubre (pin, éuse, roure...). Li tijo soun dreissado en "C" e s'envertouion un cop seco. I'a un mouloun de rizouïde brun e papilous à la baso. Li fueio de 1,5 mm de long soun en formo de lanço emé uno costo que s'acabo en pouncho. Fai raramen d'espouroufite, pamens i'a proun de proupagulo (fotò) sus li bord di fueio.

Usanço :
Lou flouquet-dis-aubre èi lou mai coumun di Zygodon au nostre. Zygodon viridissimus s'atrovo dins li fourèst mai fredo dóu Neckeretea complanatae ; si fueio soun mai torso e si proupagulo diferènto.